Светиот маченик Епимах

31 октомври (по стар стил)

Родум од Египет, во Египет се подвизуваше, во Египет маченички и го заврши овоземниот живот. Подражавајќи го свети Јован Крстител, уште како млад се оддалечи во пустината. Заради неговата голема љубов кон Бога Светиот Дух го поучи во секоја вистина, за тоа како треба да се подвизува. Кога Епимах дозна дека неверниците ги мачат и ги убиваат христијаните во Александрија заради Христа, сиот распален од ревност кон верата отиде во градот и ги урна идолите. Кога незнабошците почнаа да го мачат заради ова, тој извика: „Удирајте ме, плукајте ме, ставете ми трнов венец на главата, дајте ми трска во рацете, напојте ме со жолчка, распнете ме на крст и потоа прободете ме - тоа го претрпе мојот Господ, тоа и јас сакам да го претрпам“. Во толпата народ што го гледаше мачењето на свети Епимах имаше и една жена со слепо око. Таа плачеше горчливо од жал гледајќи го бездушното мачење на Божјиот угодник. И кога мачителите го стружеа телото на светиот Христов маченик, од него прсна крв и една капка од крвта падна на слепото око на онаа жена. Одеднаш жената прогледа и слепото око ѝ стана здраво како другото. Тогаш жената извика: „Голем е Бог во Којшто верува овој страдалник!“ По ова на свети Епимах му ја отсекоа главата и неговата душа се пресели во вечната радост, околу 250 година.