Светиот Порфириј Кавсокаливит
19 ноември (по стар стил)
Роден е во 1906 година во семејство на благочестиви, но многу сиромашни родители, на островот Евија. Се описмени читајќи Библија и богослужбени книги. На свои 12 години, откако го прочита житието на светиот Јован Колибар, толку беше вдахновен од преподобниот, што реши да го подражава, па уште истата година замина на Света Гора, каде што беше примен во Кавсокаливитскиот скит, каде помина 6 години како послушник, пред да биде потстрижан во монах. Во 1924 година сериозно се разболе, та беше испратен на лечење надвор од Света Гора. Таму, во 1926 година, се сретна со Синајскиот архиепископ Порфириј, кој беше толку впечатлен од духовните дарови на младиот монах, што го ракоположи во свештенички чин и му го даде своето име – Порфириј. Во 1940-тите години дојде во Атина, каде беше назначен за парохиски свештеник во црквата Свети Герасим, на Атинската поликлиника, близу до плоштадот Омонија. На тоа место служеше до 1973 година, и за тоа време на илјадници луѓе им помогна да најдат душевен мир, а бидејќи се стекна со дар на исцеление, многумина од нив ги исцели од болестите. Откако се пензионираше во 1973 година, се повлече во манастирот Преображение Господово, којшто самиот го основа. Не долго пред својата смрт, беше известен за денот и часот на упокојувањето. Замина на Света Гора, каде се претстави пред Господа, на 2 декември 1991 година.
