Света маченичка Севастијана
16 септември (по стар стил)
Светата маченичка Севастијана беше ученичка на апостолот Павел. Во време на прогонот на христијаните од императорот Домицијан (81-96) таа беше судена од управителот Георгиј во градот Маркианопол, во Мизија. Севастијана цврсто ја исповедаше својата вера во Христа и заради тоа беше подложена на жестоки измачувања. Најпрвин ја биеја, а потоа ја фрлија во запалена печка, од којашто таа излезе неповредена. Потоа ја пратија во градот Хераклеа каде што беше повторно судена. Управникот Помпијан заповеда да ја обесат Севастијана на дрво и да ѝ го стругаат телото. Маченичката остана непоколеблива во својата вера. Тогаш управникот заповеда да ја предадат да биде изедена од ѕверови. Но, Господ повторно ја заштити маченичката, та дивите животни не се ни допреа до неа. На крај, управникот нареди таа да биде обезглавена. Нејзиното тело беше фрлено во море, а Ангелите го пренесоа на островот Родос.
