Светата маченичка Антуса и другите со неа

22 август (по стар стил)

Ќерка на богати но незнабожни родители од Селевкија во Сирија. Кога дозна за Христа, Антуса со сето срце поверува во Него, тајно појде кај епископот Атанасиј и тој ја крсти. На Крштението ѝ се јавија Божји Ангели. Потоа отиде на подвиг во пустина, затоа што не смееше да се врати дома кај родителите. Се подвизуваше во пустината дваесет и три години. Душата Му ја предаде на Бога додека клечеше на молитва на еден камен, под кој остави завет да биде погребана. Потоа, заради верата во Христа беа заклани епископот Атанасиј и двајцата слуги на Антуса, Харис и Неофит, во времето на царот Валеријан, околу 257 година. Сите пострадаа чесно, стекнувајќи венци на невенлива слава.