Праотец Венијамин
неделата пред Рождеството Христово
Најмладиот син на старозаветниот патријарх Јаков, од неговата жена Рахила. Родоначалник на истоименото еврејско колено. Неговата мајка Рахила умрела веднаш по раѓањето. Тоа се случило близу до Витлеем, на патот на Јакова од Месопотамија во Ханаанската земја. Во претсмртните породилни маки таа го нарекла Бенон – син на мојата скрб, но неговиот татко го сменил името во Венијамин – син на мојата десница, или син на среќата. Откако Јаков го загубил Јосифа, негов омилен син станал Венијамин, што одиграло посебна улога во времето на двете патешествија на останатите синови Јаковови во Египет. Како најмлад од сите, Венијамин бил опкружен со љубовта на браќата. Во Мојсеевиот благослов, Венијамин е наречен „возљубен од Господа“, а во благословот на Јакова - „волк грабливец“, што веројатно укажува на неговата храброст и на способноста во воените дела, а исто така пророчки укажува на воинствениот карактер на неговите потомци.
