Прамајката Ева
неделата пред Рождеството Христово
Ева е името кое Адам ѝ го даде на својата жена после падот. Таа беше створена од реброто Адамово, како што читаме во Првата Книга Мојсеева. Измамена од ѓаволот во облик на змија, таа вкусила од забранетиот плод и Адама го наговорила да го направи истото. Заради престапувањето на Божата заповед следела казната – истерување од рајот и проклетство. Човекот станал смртен. Првите луѓе создадени од Бога биле предназначени за вечно блаженство. Адам и Ева знаеле само за доброто. Прекршувајќи ја послушноста кон Бога, тие го познале и злото – оддалечувањето од Бога, и претрпеле духовна смрт. И нивните тела станале смртни. Но, Господ по своето милосрдие им дал ветување на прародителите: потомството на жената ќе ја сотре главата на змијата. Тоа ветувања станало прво благовештение, бидејќи таинствено претскажувало за Спасителот на светот, Кој ќе се роди од Приснодевата Марија, новата Ева и со Својата крстна смрт и воскресение, ја порази власта на ѓаволот. Прамајката Ева е зачетничка на целиот човечки род и истовремено е таа заради чие непослушание целиот род се научи да страда. Но, искреното покајание, измиено со многуте нејзини пролеани солзи, ја направиле прамајката Ева света.
