Празник на иконата на Пресвета Богородица Купјатицка

15 ноември (по стар стил)

Оваа икона најпрво му се јави на едно девојченце по име Ана, во селото Купјатич во Минската губернија, во 1182 година. Чувајќи го стадото, Ана виде некоја светлина во шумата. Кога ѝ се приближи на светлината, на едно дрво виде крст со средна големина со ликот на Пресвета Богородица на него. Ана го зеде тој крст и си го однесе дома, па се врати кај стадото. Но, на нејзино големо чудење на истото место таа повторно го виде крстот на дрвото. Го зеде, си го стави под пазува и го однесе дома. Кога сакаше да му го покаже крстот на татко ѝ и ја завлече раката во пазувата, крстот го немаше. Таа му раскажа сѐ на татко ѝ , па отиде со него, го видоа крстот во шумата и го пренесоа дома. Утредента крстот повторно го немаше во куќата. Го кренаа цело село и сите селани отидоа и му се поклонија на крстот. Набрзо луѓето таму изградија црква. Од тој чудесен крст со иконата на Мајка Божја се пројавуваа многбројни чуда. Таа икона сега се наоѓа во црквата Света Софија во Киев.