Свети Ефрем, патријарх српски
15 јуни (по стар стил)
Роден во Трново, Бугарија. Беше син на свештеник и од рана возраст тежнееше кон духовен и подвижнички живот. Кога родителите сакаа да го женат, тој избега на Света Гора. Живееше во манастирот Хиландар, а потоа во Зограф, за на крај да се подвизува на самата планина Атос. Поради наездата на Турците, се врати од Света Гора и се насели во манастир близу Пловдив, а подоцна замина во испосница во близина на манастирот Дечани. По упокоението на патријархот Сава, во 1375 година, се јавија многу кандидати за патријаршискиот трон, но соборот на српските архијереи неочекувано го избра за патријарх преподобниот испосник Ефрем, кој горко заплака кога ја чу неочекуваната вест, но не можеше да го откаже изборот. Во 1382 година повторно се повлече во испосништво, предавајќи му го патријаршискиот престол на Спиридон. По смртта на Спиридон, во 1389 година, повторно се врати на патријаршиската должност. Ја управуваше српската црква во тешкото време на косовската пропаст, па сè до изборот на патријархот Даниил во 1392 година, кога повторно се пресели во испосница, во околината на Пеќ. Мирно се упокои во 1399 година, на 88 годишна возраст, и се пресели кај Господа, кого го љубеше. Седум години по неговата смрт, неговите мошти беа најдени нетлени и сега се наоѓаат во манастирот во Пеќ.
