Светите маченици Ина, Пина и Рима
20 јануари (по стар стил)
Овие маченици потекнуваа од Мала Скитија, која се простира од десната страна на Дунав кон Тракија, и беа ученици на светиот апостол Андреј. Се смета дека се првите Словени кои пострадале за христијанската вера. Го проповедаа името Христово меѓу варварите и многумина од нив приведоа кон верата и ги крстија. Заради тоа беа фатени од кнезот на варварите кој се обидуваше на секакви начини да ги принуди да се откажат од Христа и да им принесат жртва на идолите. Бидејќи не успеа, нареди да ги заврзат на дрвени столбови и да ги постават во замрзнатата река. Во таква положба, измачени од студот и мразот тие Му ги предадоа душите свои на Господа.
