Црковна нова година – почеток на индиктот

1 септември (по стар стил)

Во времето кога се празнуваше Новата година во Јудеја и по целата вселена, нашиот Господ Исус Христос дојде во Назарет, каде што порасна. Тоа беше во сабота, а во тој ден Евреите имаа обичај да се собираат во синагогата и да го поминуваат времето во читање на пророчките книги. Господ, „по Својот обичај“, исто така влезе во синагогата и застана меѓу учителите. Му ја подадоа книгата на пророкот Исаија и Тој, откако ја отвори книгата, го најде местото каде што е напишано: „Духот Господов е врз Мене, зашто Господ Ме помаза да им благовестам на бедните, Ме испрати да ги исцелувам скрушените по срце, да им проповедам на заробените ослободување и на затворениците отворање на темницата, да ја проповедам благопријатната година Господова“. И, откако ја затвори книгата и му ја предаде на служителот, Тој почна да кажува дека прочитаното пророштво се исполни во Него, дека Тој е вистинскиот Месија, испратен од Бог Отецот за спасение на луѓето и обновување на нивниот живот. „И сите Му посведочија, и се восхитуваа на благодатните зборови што излегуваа од устата Негова“. Овој празник е востановен на Првиот вселенски собор во Никеја, во 325 година, во времето кога светиот цар Константин Велики, ја просветли вселената со светлината на побожноста, ги искорени идолските празнувања и ја ослободи Христовата вера од тешките прогони. Тогаш светите отци одредија да се празнува Новата година како почеток на христијанската слобода, во спомен на Христовото посетување на еврејската синагога на овој ден и на Неговото проповедање за благопријатната Господова година. А ова веќе не е празник на Стариот Завет, туку на новата благодат, на Новиот Завет. Со зборот индикт се означува годишниот круг на богослужби, кој почнува на 1 септември.