Свет цар и пророк Давид Псалмопевец
неделата по Рождеството Христово
Светиот цар и пророк Давид беше предок по плот на Господа Исуса Христа. Тој беше осмиот и последен син на Јесеј, старешината на градот Витлеем. Во својата младост, Давид ги пасеше овците на својот татко. Се одликуваше со длабока вера и ревносно ја исполнуваше волјата Божја. Кога Филистејците ја нападнаа израелската земја, еден од нивните војници со име Голијат предизвикуваше огромен страв кај Евреите, бидејќи беше со огромен раст и голема сила, и никој од Евреите не се охрабруваше да му се спротивстави. Кога малечкиот Давид, кој беше дојден да им донесе храна на војниците, чу како Голијат ги навредува Евреите и нивниот Бог, излезе самиот тој на бој против него не носејќи никакво оружје – бидејќи беше премногу мал и слаб за да ги подигне штитот и мечот. Но, со еден удар со камен го усмрти Голијат, по што Евреите се охрабрија и ги победија Филистејците. После смртта на првиот еврејски цар – Саул, Давид стана негов наследник. Мудро управуваше со земјата и се трудеше да му угоди на Бога. Основа нов град за престолнина на Израел и го нарече „град на мирот“ – Јерусалим. Сакаше таму да Му изгради храм на Бога, но Бог го извести дека тоа дело ќе го направи неговиот син – Соломон. За животот на царот Давид опширно е напишано во Светото Писмо, а неговите песни – псалмите, исто така претставуваат една книга од Стариот Завет – Псалтирот.
