Светиот свештеномаченик Венијамин ѓакон
13 октомври (по стар стил)
Овој Христов војник беше Персиец и со ревносна проповед на Евангелието обрати во Христовата вера многумина незнабожни Персијци и Елини. Пострада во времето на персискиот цар Издегард, син Гороранов, во 412 година. Кога го фрлија во затвор, некој од царските големци се застапи за него кај царот. Царот го пушти, но со тоа да молчи и да не им зборува повеќе на луѓето за Христа. На тоа Венијамин одговори: „Тоа никако не можам. Зашто оној што ќе го скрие талантот бива предаден на големи маки.“ Па продолжи да ја шири Христовата вера. Царот нареди та му ставија трња под ноктите и го мачеа додека не Му го предаде својот дух на Бога.
