Преподобен Нил Синајски

12 ноември (по стар стил)

Најпрво беше префект во престолнината, во Цариград. Како женет човек, имаше еден син и една ќерка. Гледајќи го порочниот живот во престолнината, се договори со жена му да се оддалечат од светот. Така и направија. Жена му со ќерката отиде во некој женски манастир во Египет, а Нил со синот Теодул на гората Синајска. Полни шеесет години свети Нил се подвизуваше на Синај. Напиша прекрасни книги за духовниот живот. Се упокои мирно околу 450 година, во осумдесеттата година на неговиот овоземен живот. Негово е светото слово: „Телесните страсти своето потекло го водат од телесните потреби и против нив е нужно воздржание; а душевните страсти се раѓаат од душевните потреби и за нив е нужна молитва.“