Светите маченици Зинон и Зина
22 јуни (по стар стил)
Свети Зинон беше римски офицер во градот Филаделфија Арабиска, а Зина му беше слуга. Кога настана гонењето на христијаните во времето на царот Максимијан, свети Зинон се осмели и излезе пред војводата Максим пред кого ја исповедаше својата вера во Едниот Жив Бог и го посоветува да ги остави мртвите идоли и да ја прими единствената вистинита вера. Војводата се налути и го фрли во затвор. Таму Зинон беше посетен од верниот слуга Зина, при што и него го фатија и го уапсија. Потоа обајцата беа мачени за Христа и најпосле фрлени во оган, во којшто незнабошците долеваа масло. Нивните души се венчаа со невенливи венци во Христовото Царство, а телесните остатоци им ги погребаа во црквата на Свети Георгиј во местото наречено Кипарисион.
