Свети Филимон, епископ Газски
14 февруари (по стар стил)
Светиот Филимон беше апостол од седумдесетте. Тој со својата сопруга, светата маченичка Апфија, живееше во градот Колоси, во Фригија. Откако примија Свето Крштение од апостолот Павле, тие својот дом го претворија во молитвен храм, каде што се собираа сите колосјани кои веруваа во Христа, и каде што се извршуваа богослужбите на Црквата Христова. Филимон и Апфија се посветија на служење на болните и бездомните. Апостолот Филимон беше поставен за епископ на градот Газа и го проповедаше словото Божјо по целата Фригија. Светиот апостол Павле не го оставл Филимона без духовно раководство. Кон него го упати своето полно со љубов послание во кое испраќа благослов до „возљубениот Филимон, нашиот сотрудник, и до Апфија, возљубената сестра, и до Архип, нашиот другар во војувањето, и до твојата домашна црква.“ (Фил. 1,1-3). Онисим, за кого се зборува во посланието е бивши роб на Филимон. За време на прогонот на императорот Нерон (54-68), светите Филимон и Апфија, а исто така и светиот апостол Архип, кој живееше во Колоси, пострадаа маченички: за време на паганското празнување, разјарената толпа влезе во христијанскиот храм, каде што се извршуваше богослужба. Сите се разбегаа од страв, а останаа само светите Филимон, Архип и Апфија. Тие беа фатени однесени пред градоначалникот. Светиот Архип беше претепан и исечен со ножеви од страна на разулавената толпа, та почина на пат кон судот. Светите Филимон и Апфија, пак, беа убиени со каменување, по заповед на управителот.
