Светите маченици Перпетуа, Фелицитате, Сатир и другите со нив

1 февруари (по стар стил)

Во времето на царот Септимиј Север, ги фрлија во затвор зашто беа христијани. Света Перпетуа беше по потекло благородничка и таа ги храбреше другите затвореници да не се плашат да пострадаат за Христа. На сон виде лествица од земјата до небото, сета начичкана со остри ножеви, јадици, клинци и други смртоносни оружја. А на дното од лествицата лежеше страшна змија. И виде како Сатир прв претрча низ лествицата до врвот неповреден, па од врвот и довикна: „Перпетуа, ајде, те чекам! Но, чувај се од змијата!“ Охрабрена од ова Перпетуа застана на главата од змијата како на прво скалило, па брзо редум истрча до врвот. И кога се искачи на врвот, влезе во небесата и ги виде прекрасните дворци небесни и беше многу радосна. Кога им го раскажа овој сон, затворениците протолкуваа дека наскоро им претстои смрт, и тоа прво на Сатир, што набрзо и се исполни. Прво го убија Сатир, а потоа Перпетуа и другите редум. Примија од Господа вечна награда во царството на светлината. Пострадаа сите за Христа во 202 или 203 година.