Светата маченичка Фелицита и нејзините седум синови
25 јануари (по стар стил)
Како христијанка во времето на царот Антонин беше осудена на смрт заедно со нејзините седум синови: Јануариј, Феликс, Филип, Силуан, Александар, Виталиј и Марцијал. Му се молеше на Бога само да не ја погубат пред нејзините синови, за да може да ги храбри во маките и страдањата и да не се одречат од Христа. Бог така и устрои. Оваа ненадмината мајка со радост ги испраќаше синовите еден по друг додека сите не ги виде погубени. Тогаш и таа, благодарејќи Му на Бога, прими маченичка смрт. Сите пострадаа во Рим, каде што им се наоѓаат и моштите.
