Преподобен Јован Прозорлив

27 март (по стар стил)

До неговата дваесет и петта година беше дрводелец, а потоа гонет од неодолива желба за постојана молитва, се оддалечи во пустина и таму поживеа до својата смрт, т.е. до деведесеттата година. Телесен, но како бестелесен. Проѕираше во срцето на секој човек што ќе му се приближеше и можеше да му го каже и името и неговата желба и мисла. На царот Теодосиј му го пророкуваше исходот на битките; им пророкуваше и на војводите, монасите и на секого којшто имаше потреба да дознае што се крие во темнината на идните денови за него. Еден кнез го молеше да ја прими неговата жена, која особено сакаше да го види. Светителот не сакаше да ѝ удоволи на празната љубопитност, туку во сон ѝ се јави на кнегињата таков каков што е. Кога жената му го опишна мажот нејзиното видение, тој ѝ потврди дека ликот на Јован е навистина таков. Своите посетители ги поучуваше за смирението како за основна добродетел, секогаш наведувајќи примери од животот како многубројни возвишени карактери гордоста ги урнала во прав, наведувајќи ги на тешки гревови. Самиот издржа големи напади од демоните. Еднаш му се јави сатаната со множество од демони во вид на сјајни ангели. Тие го гонеа да му се поклони на сатаната, мамејќи дека тоа е Христос. А светителот мудро им одговори: „На Царот мој Исус Христос јас Му се поклонувам секој ден; да беше ова Тој немаше од мене особено да бара токму сега да Му се поклонам“. По овие зборови целата зла сила исчезна како чад. Светиот Јован прозорлив се упокои мирно коленичејќи на молитва, во неговата деведесетта година.