Светите маченици Јувентин и Максимин
5 септември (по стар стил)
За животот на овие двајца свети луѓе се знае многу малку, но нивното страдање за Христа нѝ е познато од беседата на свети Јован Златоуст во нивна пофалба. Тие беа војници во времето на царот Јулијан Отстапник. На еден војнички пир, во разговор со другите, тие го осудија царот заради гонењето на христијаните. Некој му го јави тоа на царот и царот ги фрли во затвор. Некои од луѓето на царот ги посетија со намера да ги одвратат од вистинската вера, велејќи им дека многу од нивните другари се откажале од Христа. На тоа тие витешки одговорија: „За тоа токму ние мораме да стоиме храбро и да се принесеме себеси на жртва заради нивното отстапништво.“ Убиени се ноќе со меч. Но, потоа, се пронајдени нивните мошти, а од нив се пројави чудотворна сила.
