Свети Стефан епископ Пермски
26 април (по стар стил)
По потекло Русин. Од малечок предаден на молитва и богомислие. Како момче отиде во Ростов и се замонаши во манастирот Свети Григориј Богослов. Кога дозна за Пермската земја, целата обрасната во плевелот на незнабоштвото, посака да оди како мисионер во оваа земја, та веднаш се вдаде во изучување на пермскиот јазик и кога го совлада, состави азбука и ги преведе на тој јазик црковните книги. Со благослов на московскиот митрополит, тој како презвитер се упати на својот апостолски подвиг и во густиот мрак на пермското незнабоштво со огромна ревност почна да го проповеда Господовото Евангелие. Откако крсти неколкумина, се потруди да изгради во Перма храм на Светото Благовештение. Кога во Перма се умножи Црквата Божја, свети Стефан го посветија за нејзин епископ. Претрпе секаков труд, мака, злоба и понижувања, но ја разгони темнината на пермските незнабошци и ги просветли со Христовата светлина. На старост уште еднаш отиде во Москва и таму се упокои во Господа, во 1396 година.
