Света Агнија римјанка
21 јануари (по стар стил)
Маченичката Агнија се роди во Рим, во семејство на благочестиви родители, и беше воспитана во христијанската вера. Кога имаше 13 години, откажа да се омажи за синот на началникот на областа и да принесе жртва на паганската богиња Веста. Заради тоа беше казнета – гола испратена во јавна куќа. Но, Бог устрои да ѝ порасне косата до толку многу што ѝ го покриваше целото тело, како облека, а во куќата ја пресретна Ангел Божји кој ја покри со таква блескава светлина што нечестивите младичи кои биле таму не можеа ниту да ја гледаат. Кога светата Агнија почна да се моли, виде пред себе бела облека, исткаена од Ангелите. Младичот кој ги предизвика сите овие неволји за светата Агнија влезе во собата за да ја обесчести, но наместо тоа, веднаш падна мртов. По молба на таткото на момчето, Агнија со својата молитва го воскресна умрениот, кој веднаш почна да го слави Бога. Заради ова чудо, во Христа поверуваа и се крстија 160 луѓе. Сите тие, заедно со младичот беа веднаш предадени на смрт. Светата Агнија беше подложена на жестоки измачувања и на крај беше убиена со меч во грлото. На нејзиниот гроб, по многу години, прими исцеление Констанција, ќерката на Константин Велики и во знак на благодарност подигна црква на тоа место, а подоцна и женски манастир.
