Свети Ефтимиј Трновски
20 јануари (по стар стил)
Ревнител на духовното просветлување на Бугарија и заштитник на исихазмот. Рано му се посвети себеси на Бога и прими монашки потстриг. Во младешките години неколку години помина во Константинопол и на Света Гора каде се подвизуваше под раководство на опитни старци. Се врати во татковината и се насели во една пештера недалеку од Трново. Наскоро околу него се собраа ревносни ученици и се оформи цел манастир, кој со текот на времето се претвори во огниште на просвета и чист духовен живот. Тука светиот Ефтимиј се посвети на исправање на словенскиот текст на свештените и богослужбени книги, споредувајќи ги со грчките изворници, преведе и други текстови и пишуваше житија и пофални слова. Славата на свети Ефтимиј како голем молитвеник, строг подвижник, посветен и вдахновен проповедник го доведе до патријаршискиот престол на Бугарската Црква во 1375 година. Татковски се грижеше за посветеното му духовно стадо, успешно се бореше со богомилската ерес и со лажните учења на следбениците на Варлаам и Акиндин. Во 1393 година Бугарија падна под Отоманска власт. Во време на борбата свети Ефтимиј смело дојде кај Турците барајќи мир. Турците не се осмелија да посегнат по животот на светителот. По поробувањето, Ефтимиј со указ од султанот беше испратен во заточение во Тракија каде што продолжи да проповеда и да ги храбри своите сонародници да не го примаат исламот. Се упокои околу 1403 година.
