Преподобен Илија Калабриски
17 август (по стар стил)
По потекло Грк и настојател на манастирот Меликук во Калабрија, во Јужна Италија. Во времето на иконоборството на Исток многумина источни монаси пребегаа со иконите во Калабрија. Со текот на времето, во Калабрија многу се распростре монашкиот живот. Калабриските монаси се одликуваа со голема ученост и со голема строгост на животот. Едно време во Калабрија имаше толку многу православни монаси и манастири, што ја споредуваа со древниот Египет. Православна Калабрија подоцна низ вековите потпадна под охридските архиепископи. Преподобен Илија се упокои во Солун, во 903 година.
